(ភ្នំពេញ)៖ សមត្ថកិច្ចនគបាលព្រហ្មទណ្ឌកម្រិតស្រាលរាជធានីភ្នំពេញ កាលពីព្រលប់ថ្ងៃទី១២ខែ កញ្ញា បានឃាត់ខ្លួនឧកញ៉ា ជួប ច័ន្ទ ដែលគេច្រើនស្គាល់ថា ជាឧកញ៉ារកស៊ីទិញលក់ដី ពាក់ព័ន្ធករណីចេញមូលប្បទានប័ត្រអត់សាច់ប្រាក់(សែកស្អុយ)ជាងមួយលានដុល្លារអាមេរិកឲ្យកូនប្រុសលោកឧកញ៉ា គឹម ហាប់ ។
ប្រភពពីសមត្ថកិច្ចបានឲ្យដឹងថា ឧកញ៉ានេះកំពុងត្រូវកសាងសំណុំរឿងបញ្ជូនទៅតុលាការដើម្បីចាត់ការតាមច្បាប់។ប្រភពដដែលបានឲ្យដឹងថា លោក លីវ វុទ្ធី តំណាងឲ្យក្រុមហ៊ុន គឹម កៅ ដែលជាកូនប្រុសលោកឧកញ៉ា គឹម ហាប់បានដាក់ពាក្យប្តឹងលោកឧកញ៉ា ជួប ច័ន្ទ ពីបទចេញមូលប្បទានប័ត្រគ្មានសាច់ប្រាក់ចំនួនជាង១លានដុល្លារអាមេរិក ។
ប្រភពបន្តថាករណីចេញមូលប្បទានប័ត្រគ្មានសាច់ប្រាក់នេះគឺ ឧកញ៉ា ជួប ច័ន្ទ បានរកស៊ីជាមួយ ក្រុមហ៊ុនលោកឧកញ៉ា គឹម កៅ លើទឹកប្រាក់ប្រមាណ៣លានដុល្លារអាមេរិក។ ប៉ុន្តែក្រោយមក លោកឧញ៉ា គឹម កៅ បានទារប្រាក់នេះវិញ ទើបឧកញ៉ា ជួប ច័ន្ទ ចេញសែកឲ្យទៅឧកញ៉ា គឹម កៅ ដែលមានទឹកប្រាក់ជាង១លានដុល្លារអាមេរិក ដោយបានកំណត់ឲ្យទៅបើកនៅធនាគារនៅថ្ងៃទី៣០ ខែកក្កដាឆ្នាំ ២១០៧។ ប៉ុន្តែពេលភាគីឧកញ៉ា គឹម កៅ យកសែកទៅបើកលុយ ស្រាប់តែខាងធនាគារបញ្ជាក់មកវិញថាមូលប្បទានប័ត្រនេះគ្មានសាច់ប្រាក់ទេ ។
ក្រោយបានទទួលពាក្យបណ្តឹងរបស់លោក លីវ វុទ្ធីរួចហើយសមត្ថកិច្ចបានអញ្ជើញ ឧកញ៉ា ជួប ច័ន្ទ ឲ្យចូលបំភ្លឺលើពាក្យបណ្តឹងនេះ។ប៉ុន្តែពេលឧកញ៉ា ជួប ច័ន្ទ ចូលបំភ្លឺក៏ត្រូវសមត្តកិច្ចឃាត់ខ្លួនតែម្តងដោយយោងតាមការឯកភាពពីលោកស៊ិន វិរៈ ព្រះរាជអាជ្ញារងអមសាលាដំបូងរាជធានីភ្នំពេញ ៕
No comments:
Post a Comment